Policia spanjolle zhvilloi një operacion të suksesshëm në provincën e Korunjës, ku sekuestruan 1.410 kilogramë kokainë dhe arrestuan tre persona, përfshirë kreun e bandës së njohur “Fanchos”. Operacioni nisi më 20 gusht pas informacionit për ardhjen nga deti të një sasie të madhe droge, ndërsa hetuesit monitoruan lëvizjet e të dyshuarve deri në momentin e arrestimit të tyre gjatë transportimit të ngarkesës. Në bashkëpunim me Administratën Amerikane për Luftën kundër Drogës (DEA), autoritetet zbuluan se banda kishte marrë përsipër shkarkimin dhe fshehjen e drogës në zona pranë plazhit O Conchido. Përveç kokainës, u sekuestruan edhe rreth 100 gramë heroinë, para cash dhe sende të tjera që po shqyrtohen në kuadër të hetimit, ndërsa të arrestuarit pritet të përballen me drejtësinë spanjolle për trafikim dhe pjesëmarrje në organizatë kriminale.