Policia e Durrësit ka finalizuar operacionin e koduar “Banesa”, duke sekuestruar 8 kilogramë kanabis dhe arrestuar në flagrancë një 30-vjeçar, E.K., i cili kishte fshehur drogën në një banesë të pabanuar pranë shtëpisë së tij në lagjen nr. 8. Arrestimi u bë në momentin që ai po tentonte të merrte lëndën narkotike, ndërsa droga u sekuestrua si provë materiale. Operacioni u organizua nga specialistët e Seksionit për Hetimin e Narkotikëve në bashkëpunim me Forcën e Posaçme Operacionale të DVP Durrës, bazuar në informacionet e siguruara në rrugë operative. Hetimet vazhdojnë për të dokumentuar plotësisht rastin dhe për të identifikuar personat e tjerë të përfshirë, ndërsa materialet procedurale janë dorëzuar në Prokurorinë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.