Policia e Kosovës ka zbuluar dhe sekuestruar një sasi të konsiderueshme armësh, municioni dhe pajisjesh ushtarake gjatë kontrollit të dy shtëpive të pabanuara në fshatin Potokmali të Leposaviqit më 29 qershor. Në një prej lokacioneve janë gjetur një armë e gjatë, dy krehër me 20 fishekë, dy kuti me sfera metalike dhe një makineri për mbushjen e fishekëve të armëve të gjuetisë. Në shtëpinë tjetër janë sekuestruar një radiolidhje, një revole me karikator dhe pesë fishekë, shumë krehër dhe municion për armë gjuetie, si dhe një xhaketë ushtarake me mbishkrime të Serbisë. Policia ka njoftuar prokurorin kompetent dhe hetimet vazhdojnë për të sqaruar rrethanat dhe për të identifikuar personat përgjegjës.