Në pikën kufitare të Vërmicës, Dogana e Kosovës ka sekuestruar mallra të padeklaruara me vlerë rreth 1,500 euro në një automjet me targa të huaja. Gjatë kontrollit rutinë, drejtuesi i automjetit deklaroi se nuk kishte mallra për të deklaruar, por pas analizës së riskut dhe bashkëpunimit me policinë, automjeti u dërgua për kontroll të detajuar në vijën e dytë. Në këtë kontroll u konstatua prania e mallrave të padeklaruara, ndërsa personi përgjegjës, një shtetas i huaj, u procedua sipas ligjit dhe u ndërmorën të gjitha veprimet ligjore të nevojshme. Dogana e Kosovës thekson përkushtimin e saj në zbatimin e ligjit dhe luftimin e dukurive të kundërligjshme, duke siguruar trajtim të barabartë dhe mbrojtje të ekonomisë së vendit.