Në një operacion të koduar “Audienca”, i zhvilluar nga Prokuroria e Tiranës dhe Seksioni për Hetimin e Krimeve Ekonomiko-Financiare, u sekuestruan mbi 10 mijë suplemente ushqimore dhe bimore të skaduara, pa pulla të Agjencisë së Barnave dhe Ministrisë së Financave, si dhe pa etiketa në gjuhën shqipe në një magazinë në Tiranë. Subjekti i kontrolluar kishte aktivitet ndërkombëtar në fushën e reklamimit digjital, ndërsa drejtuesi i tij, shtetasi boshnjak J. T., 53 vjeç, u shpall në kërkim dhe po punohet për kapjen e tij. Gjithashtu, u proceduan penalisht dy punonjës të magazinës, J. G., 30 vjeç dhe M. Ç., 26 vjeç. Materialet iu referuan Prokurorisë për veprime të mëtejshme lidhur me veprat penale të kontrabandës, fshehjes së të ardhurave dhe tregtimit të ushqimeve të rrezikshme për shëndetin e njerëzve.