Policia e Shtetit ka finalizuar operacionin “Stolen Gold”, duke goditur një skemë kriminale që trafikonte dhe tregtonte sende me vlerë të dyshuara si të vjedhura jashtë Shqipërisë, kryesisht nga Italia dhe Greqia. Gjatë operacionit janë sekuestruar mbi 15 kg ari, më shumë se 4 kg argjendi, 612 ora të markave të ndryshme, 13 varëse me gurë diamanti dhe sende të tjera me vlerë, me një vlerësim paraprak prej rreth 2 milionë eurosh. Në pranga ka rënë një 27-vjeçar nga fshati Kreshpan, Fier, ndërsa një tjetër person 45-vjeçar është shpallur në kërkim, ndërkohë që janë proceduar penalisht shtatë administratorë argjendarish në Fier dhe Lushnjë. Hetimet vijojnë për identifikimin e personave të tjerë të përfshirë në këtë rrjet kriminal dhe për dokumentimin ligjor të plotë të veprimtarisë së tyre.