Prokuroria Themelore në Pejë, në bashkëpunim me Njësitin për Luftimin e Narkotikëve, ka realizuar një aksion të suksesshëm ku janë sekuestruar substanca narkotike të ndryshme, përfshirë 60 doza LSD, 10 tableta Acetamil, 2 gramë Crystal Meth dhe 25 tableta ekstazi. Substancat dyshohet se kanë ardhur nga jashtë vendit përmes shërbimeve postare. Gjatë këtij operacioni është arrestuar një person i dyshuar për blerje, posedim dhe shpërndarje të paautorizuar të narkotikëve dhe substancave psikotrope. I dyshuari është ndaluar për 48 orë dhe hetimet po vazhdojnë për të zbuluar të gjitha rrethanat dhe për të identifikuar të tjerë të përfshirë. Prokuroria thekson se lufta kundër narkotikëve mbetet prioritet kryesor për mbrojtjen e shëndetit publik dhe veçanërisht të të rinjve.