Në bregdetin e Jalës ka nisur një aksion i IKMT-së për shembjen e disa strukturave pa leje, kryesisht beach bar-e dhe ndërtime të tjera me konstruksion druri, të ngritura jashtë hapësirave të lejuara nga Bashkia. Operacioni po zhvillohet në orët e paradites së së premtes, me mbështetjen e Policisë së Himarës, dhe deri tani nuk janë regjistruar incidente apo përplasje me forcat e rendit. Pronarët e ndërtimeve kanë nisur vetë çmontimin e disa prej tyre para ndërhyrjes së mjeteve të IKMT-së. Aksioni do të vazhdojë gjatë ditës me qëllim lirimin e hapësirave publike dhe zbatimin e ligjit në vijën bregdetare.