Ministrja e Ambientit dhe Planifikimit Hapësinor, Fitore Pacolli, ka reaguar pas shembjes së rrugës “Don Shtjefën Kurti” në Prishtinë, duke e cilësuar ngjarjen si pasojë të drejtpërdrejtë të neglizhimit të standardeve të ndërtimit. Ajo theksoi rëndësinë e respektimit të ligjit dhe kritereve teknike për mbrojtjen e jetës së qytetarëve dhe stabilitetin e infrastrukturës. Ministria po punon për të vendosur rend dhe rregull, ndërsa paralajmëroi se komunat do të mbajnë përgjegjësi dhe do të ndëshkohen për mungesën e inspektimit dhe mosrespektimin e standardeve. Për të parandaluar improvizime të mëtejshme, Pacolli njoftoi se me Planin e ri Hapësinor të Kosovës do të vendosen kritere të rrepta dhe standarde të forta në ndërtim.