Shtatë anëtarë të një familjeje mbetën të bllokuar në rrjedhën e lumit Drini i Zi në zonën e “Ura e Gjoricës” në Bulqizë, për shkak të rritjes së menjëhershme të nivelit të ujit. Një prej tyre dha alarmin dhe kërkoi ndihmë, duke bërë që shërbimet e Policisë së Bulqizës, Emergjencat Civile të Prefekturës Dibër dhe zjarrfikësit të organizojnë një operacion shpëtimi. Ata u nxorën të gjithë në mënyrë të sigurt me gomone dhe fatmirësisht janë në gjendje të mirë shëndetësore. Policia apelon për kujdes maksimal pranë lumenjve dhe njoftim të menjëhershëm në rast emergjence në numrin 112.