Tre turistë gjermanë mbetën të bllokuar mes shkëmbinjve në malin e Çikës, pjesë e Parkut Kombëtar të Llogarasë, pasi humbën orientimin gjatë ecjes në një terren tepër të vështirë. Pas marrjes së sinjalit SOS, u organizua një operacion kërkim-shpëtimi që zgjati rreth katër orë, ku u angazhuan forca speciale Delta Force, Policia e Vlorës, punonjës të Administratës së Zonave të Mbrojtura dhe një helikopter për ndërhyrje nga ajri. Pas lokalizimit, turistët u nxorën me helikopter dhe u transportuan në Qendrën Shëndetësore të Palasës, ku morën ndihmën e parë mjekësore dhe nuk paraqesin probleme serioze shëndetësore. Ky rast është i pestë brenda dy muajve ku turistë të huaj mbeten të bllokuar ose lëndohen gjatë eksplorimit të kësaj zone malore.