Një shtetase italiane u aksidentua gjatë skijimit në zonën e Brezovicës, në kufirin mes Kosovës dhe Maqedonisë së Veriut, ku pësoi frakturë në këmbë dhe nuk mund të lëvizte. Shërbimi i Kërkim-Shpëtimit Malor i Kosovës ndërhyri menjëherë me dy ekipe, duke ofruar ndihmën e parë dhe imobilizimin e saj në vendin e aksidentit. Për shkak të izolimit të zonës dhe vendndodhjes brenda territorit të Maqedonisë së Veriut, evakuimi u realizua me helikopter në bashkëpunim me autoritetet maqedonase. Operacioni u zhvillua me koordinim ndërkombëtar, duke përfshirë Ambasadën e Italisë në Kosovë dhe Maqedoni, Agjencinë Italiane për Bashkëpunim dhe Zhvillim, si dhe mbështetjen e menaxhmentit të Qendrës së Skijimit në Brezovicë.