Në Shqipëri vazhdojnë të jenë aktive 11 vatra zjarri nga 21 të raportuara ditën e djeshme, ndërsa pesë janë nën monitorim dhe pesë të tjera janë shuar. Për përballimin e situatës janë angazhuar mbi 1,100 forca, përfshirë efektivë vendas dhe të Forcave të Armatosura, si dhe 59 automjete zjarrfikëse dhe mbështetje ajrore me katër helikopterë dhe një avion Air Tractor. Vatrat aktive ndodhen në zona të ndryshme si Fieri, Shkodra, Mati, Tirana, Bulqiza, Elbasani dhe Lezha, ndërsa në Himarë zjarri në lagjen “1 Maji” është shuar pas një operacioni të gjerë, ku u dogjën gjashtë banesa dhe u evakuan 36 persona. Agjencia Kombëtare e Mbrojtjes Civile dhe strukturat lokale vijojnë monitorimin dhe mbajnë kapacitetet operacionale në gatishmëri për të mbrojtur jetën dhe pronën e qytetarëve.