Gjatë 24 orëve të fundit në Shqipëri janë raportuar 43 vatra zjarri, nga të cilat 11 mbeten aktive dhe 8 janë nën mbikëqyrje, ndërsa 24 janë fikur. Në terren janë angazhuar mbi 1000 forca, duke përfshirë zjarrfikës vendorë, efektivë të Forcave të Armatosura, mjete zjarrfikëse, helikopterë dhe avionë për të përballuar situatën në qarqet Tiranë, Dibër, Lezhë, Shkodër, Elbasan, Vlorë dhe Fier. Autoritetet theksojnë se nuk ka rrezik për zonat e banuara në shumicën e vatrave aktive, ndërsa operacionet vijojnë intensivisht për të mbrojtur jetën, pronat dhe mjedisin. Agjencia Kombëtare e Mbrojtjes Civile dhe strukturat vendore janë në gatishmëri të plotë, duke monitoruar situatën dhe duke ndërhyrë aty ku nevoja është më e madhe.