Zyra Kombëtare e Auditimit (ZKA) ka zbuluar se Shërbimi Klinik Universitar i Kosovës (SHSKUK) ka përfshirë në stokun farmaceutik shtatë artikuj me afat të skaduar, me vlerë rreth 58 mijë euro, të cilët nuk janë larguar si të tillë nga sistemi. Kjo situatë ka ndodhur për shkak të mungesës së monitorimit të rregullt dhe kontrollit periodik të barnave, duke sjellë mbivlerësim të stokut në pasqyrat financiare. Përveç kësaj, ZKA ka gjetur vonesa në furnizimin me aparatura mjekësore, ku katër pagesa në vlerë 927,200 euro janë shoqëruar me vonesa deri në 52 ditë dhe zgjatje të paautorizuara të afateve kontraktuale, pa aplikim të penaliteteve. SHSKUK ka pranuar opinion të kualifikuar për pasqyrat financiare dhe ka sqaruar se barnat me afat të skaduar nuk janë blerë me afat të skaduar, por kanë mbetur në stok për shkak të përdorimit të pamjaftueshëm, ndërsa nga 1 janari i këtij viti janë larguar automatikisht nga sistemi.