Seanca gjyqësore ndaj Ramadan Morinës, i akuzuar për krime lufte në fshatin Burim të Malishevës gjatë periudhës 1998-99, është shtyrë me kërkesë të mbrojtjes së tij. Avokati Arianit Koci ngriti shqetësim për një gabim teknik në dokumentet e gjykatës, ku ai dhe i mbrojturi i tij ishin cilësuar si “serb”, çka shkaktoi debat në sallën e gjykimit me kryetarin e trupit gjykues, Rrahman Beqirin. Gjykata sqaroi se bëhej fjalë për një gabim teknik dhe se në raste të ngjashme shpesh kërkohet përkthim për shkak të nacionaliteteve të të akuzuarve, duke mohuar çdo qëllim diskriminues. Gjykata vendosi të shtyjë seancën derisa mbrojtja të marrë dëshminë e një dëshmitari anonim, duke i dhënë kohë Prokurorisë Speciale të përmbushë këtë detyrim brenda tre ditëve.