Byroja Kosovare e Sigurimit, në bashkëpunim me Policinë e Kosovës dhe Bankën Qendrore të Kosovës, ka nisur një fushatë vetëdijësuese për përdorimin e Raportit Evropian të Aksidentit, që synon të lehtësojë trajtimin e aksidenteve me dëme materiale të vogla. Kjo nismë pritet të përshpejtojë procedurat për qytetarët, të zvogëlojë ngarkesën administrative dhe të lirësojë rrugët pas aksidenteve, duke përmirësuar edhe bashkëpunimin institucional. Statistikat tregojnë se numri i aksidenteve me persona të vdekur ka mbetur i pandryshuar, ndërsa aksidentet me dëme materiale dhe lëndime kanë shënuar rënie. Përfaqësuesit e institucioneve theksojnë se përdorimi i këtij raporti do të afrojë praktikat vendore me standardet evropiane dhe do të sjellë një trajtim më efikas dhe modern të rasteve të aksidenteve rrugore.