Një 27-vjeçar me origjinë jordaneze u arrestua në Budapest, i dyshuar për vjedhjen e të dhënave të kartës bankare të aktorit të famshëm Johnny Depp dhe shpenzimin e mbi gjysmë milioni paundëve nga llogaria e tij. Aktori 62-vjeçar nuk kishte vënë re asnjë aktivitet të dyshimtë për më shumë se dy vjet, derisa banka amerikane sinjalizoi transaksionet e paligjshme dhe njoftoi autoritetet. Hetimet zbuluan se nga janari 2024 deri në dhjetor 2025 u kryen 308 transaksione luksi, përfshirë blerje dhe udhëtime të shtrenjta, shumica të lidhura me stilin e jetesës së Depp-it. Gjatë bastisjes në banesën e të dyshuarit në Budapest u gjetën edhe substanca të dyshuara narkotike, duke e rënduar pozicionin e tij ligjor, ndërsa hetuesit po shqyrtojnë nëse rrjedhja e të dhënave ndodhi gjatë qëndrimit të aktorit në kryeqytetin hungarez për xhirimet e filmit të tij.