Agjencia e Ushqimit dhe Veterinarisë (AUV) monitoron në terren situatën me lisë e vogël te delet dhe dhitë, duke marrë masa mbrojtëse dhe kontrolluese në kohë. Aktualisht, po punohet për sigurimin dhe testimin e vaksinave, me bashkëpunim nga Komisioni Evropian dhe Turqia, ndërsa vaksinimi do të nisë vetëm pas miratimit zyrtar. Fermerët paralajmërohen se çdo vaksinim i kryer pa autorizim nuk do të kompensohet dhe do të sanksionohet, ndërsa kafshët e sëmura do të eutanazizohen dhe varrosen sipas protokolleve. Mbarështuesit kërkojnë urgjentisht vaksinim dhe kompensim më të lartë, duke theksuar rëndësinë e ndërhyrjes së shpejtë për të mbrojtur fermat nga përhapja e sëmundjes.