Policia e Shtetit në Shqipëri finalizoi operacionin e koduar “Banka e Rreme 2”, duke ndaluar një 25-vjeçar me shtetësi holandeze dhe duke shpallur në kërkim bashkëpunëtorin e tij, të dyshuar për veprat penale “Mashtrimi kompjuterik” dhe “Falsifikimi kompjuterik”. Ata organizonin një fushatë mashtruese të tipit “smishing”, ku qytetarëve u dërgoheshin mesazhe SMS në emër të një institucioni bankar të nivelit të dytë, duke i kërkuar përditësimin e të dhënave bankare përmes linkeve mashtruese që imitonin faqen zyrtare të bankës. Si pasojë, disa qytetarë dhanë të dhënat e tyre personale dhe bankare, duke u bërë viktima të mashtrimit. Policia apelon për kujdes maksimal ndaj mesazheve dhe linkeve të dyshimta dhe fton qytetarët të raportojnë çdo rast të dyshimtë pranë institucioneve përkatëse.