Në procesin penal ndaj Laert Haxhiut, kreut të një bande kriminale, dëshmon i penduari i drejtësisë Artan Tafani, i cili rrëfen detajet e vendosjes së tritolit në biznesin e reperit Noizy. Ngjarja ka nisur pas një konflikti fillimisht në rrjetin social TikTok dhe më pas në një përplasje fizike mes Noizy-t dhe Kleviol Ahmetajt, mik i Laert Haxhiut. Pas incidentit, u mor vendimi për hakmarrje dhe u organizua shpërthimi me tritol, i cili u vendos në një dyqan poshtë lokalit, pasi nuk u gjet hyrja në katin e dytë. Tafani përshkruan edhe mënyrën e ekzekutimit të sulmit, duke treguar se eksplozivi u ndez dhe shpërthimi u dëgjua pak çaste pas largimit të tyre.