Një grup prej 87 shtetasish serbë, të cilët dyshohen për lidhje me veprime kriminale dhe trazira në Serbi, u ndaluan dhe u dëbuan nga Mali i Zi pasi tentuan të hynin në vend gjatë Samitit të Bashkimit Evropian dhe Ballkanit Perëndimor në Tivat. Një pjesë e tyre kishte rezervuar akomodim në kompleksin luksoz “Lushtica Bay” përmes një agjencie turistike nga Bijeljina, por autoritetet malazeze i konsideruan këta persona si kërcënim për sigurinë kombëtare dhe i ndaluan hyrjen. Fluturimi çarter nga Beogradi u miratua nga autoritetet ajrore malazeze, por pas mbërritjes, grupi u kthye në Serbi në të njëjtën ditë. Në reagim ndaj dëbimit, Serbia ka vështirësuar hyrjen e shtetasve malazezë në territorin e saj, ndërsa presidenti serb Vuçiq, pavarësisht kërcënimeve për sigurinë, ka vizituar Tivatin gjatë samitit.