Një 43-vjeçar nga Afganistani është arrestuar nga Policia Kufitare e Vlorës, pasi dyshohet se organizoi futjen e paligjshme të 10 emigrantëve nga Greqia në Shqipëri, me qëllim transportimin e tyre më pas drejt Italisë. Ngjarja u zbulua pas ndërhyrjes së policisë pranë ishullit të Sazanit, ku 11 persona që lundronin me një gomone rrezikuan të mbyteshin. Hetimet paraprake tregojnë se i dyshuari kishte marrë gomonen në Seman të Fierit, në një vend që i ishte dërguar nga një shtetas shqiptar ende i paidentifikuar, për të cilin po vazhdojnë kërkimet. Përveç arrestimit të organizatorit, janë proceduar penalisht edhe 10 emigrantët nga Bangladeshi, Pakistani, Liberia dhe Haiti, ndërsa autoritetet vijojnë hetimet për zbardhjen e plotë të ngjarjes dhe kapjen e personave të tjerë të përfshirë.