Instituti i Kosovës për Drejtësi (IKD) ka evidentuar se sistemi i drejtësisë në Kosovë mbingarkohet nga zvarritja e rasteve civile, shpërndarja joadekuate e prokurorëve dhe gjyqtarëve, si dhe mungesa e kompensimit të palëve të dëmtuara në procedurat penale. Sipas raportit të IKD-së, ngarkesa mes prokurorive nuk është e harmonizuar dhe sistemi prokurorial mat efikasitetin vetëm në bazë të numrit të lëndëve të përfunduara, pa marrë parasysh peshën e tyre, duke krijuar kështu probleme në trajtimin e rasteve. Edhe pse numri i gjyqtarëve dhe prokurorëve është rritur, kohëzgjatja e trajtimit të rasteve mbetet e lartë, ndërsa administrata publike kontribuon në mbingarkimin e gjyqësorit duke mos përmbushur detyrimet ndaj qytetarëve. Gjithashtu, kompensimi i palëve të dëmtuara në procedurat penale ndodh shumë rrallë, duke detyruar këto palë të nisin procese të reja civile, që shtojnë barrën dhe zvarritjen në sistemin gjyqësor.