Një hetim i Qendrës për Gazetarinë Hulumtuese të Serbisë (CINS) ka zbuluar dyshime serioze mbi mungesën e transparencës dhe përfshirjen e kompanive me lidhje me botën kriminale në projektin EXPO 2027. Ndërsa autoritetet flasin për investime qindra milionëshe në infrastrukturë, në terren janë angazhuar kompani dhe individë të lidhur me figura të njohura të krimit të organizuar dhe qarqeve politike e biznesi. Raporti evidenton se në listën e kontraktorëve dhe furnizuesve janë përfshirë subjekte me lidhje me persona të dënuar për vepra të rënda penale dhe me individë të afërt me pushtetin, duke ngritur shqetësime për shpërndarjen e fondeve publike. Autoritetet nuk kanë dhënë ende një reagim të detajuar, ndërsa hetimi nxjerr në pah një rrjet kompleks interesash ku ndërthuren biznesi, politika dhe figura të kontestuara, duke vënë në pikëpyetje integritetin e prokurimeve publike në këtë projekt strategjik.