Gjykata Penale në Maqedoninë e Veriut ka caktuar masën e paraburgimit për gjashtë persona të dyshuar për shpërndarjen e botoksit dhe fillerëve të falsifikuar, ndërsa katër të tjerë janë në arrest shtëpiak dhe nëntë nën masa kujdesi. Në këtë rrjet kriminal janë përfshirë mjekë nga spitali “8 Shtatori” dhe Klinika e Dermatologjisë, pronarë ordinancash private, bashkëpunëtorë, si dhe një doganier që dyshohet se ka marrë ryshfet për të lejuar kontrabandën e produkteve pa kontroll. Prokuroria për Ndjekjen e Krimit të Organizuar dhe Korrupsionit zhvilloi një hetim disa mujor dhe aksione në Shkup, Strumicë dhe Manastir, duke goditur këtë grup kriminal që kontrabandonte produkte nga Serbia, Koreja dhe Turqia pa regjistrim dhe kontrolle të nevojshme. Autoritetet paralajmërojnë për rreziqet serioze shëndetësore nga përdorimi i këtyre produkteve të pakontrolluara, ndërsa Lidhja e Odave Ekonomike dhe Ministria e Shëndetësisë kërkojnë hetim transparent dhe respektim të etikës mjekësore, duke apeluar qytetarët të përdorin vetëm shërbime të autorizuara dhe të licencuara.