Ish-shefi i policisë së Beogradit dhe ish-këshilltari i presidentit serb, Veselin Miliq, është arrestuar dhe ndodhet në paraburgim 30-ditor për fshehjen e një vrasjeje të rëndë dhe pengim të hetimeve për zhdukjen e Aleksandar Neshoviqit, i njohur si “Baja”, i lidhur me një klan kriminal. Sipas hetimeve, Neshoviqi u vra në një restorant në Beograd nga Sasha Vukoviq Boske, ndërsa Miliq ishte i pranishëm dhe dyshohet se tentoi të pajtonte dyshuarit. Pas vrasjes, disa policë të lidhur me Miliqin nxorën trupin nga restoranti dhe e dogjën pranë autostradës, ndërsa Miliq dhe një tjetër oficer fshinë gjurmët dhe pamjet nga kamerat e sigurisë. Në total janë arrestuar nëntë persona, përfshirë tre policë, ndërsa opozita në Serbi kërkon dorëheqjen e ministrit të Brendshëm dhe drejtuesve të policisë, duke e cilësuar këtë aferë si dëshmi të lidhjeve të ngushta mes strukturave shtetërore dhe grupeve kriminale.