Bashkia Gjirokastër ka reaguar fuqishëm pas përhapjes së një lajmi të rremë në rrjetet sociale, sipas të cilit kryetari i bashkisë dhe 18 punonjës të institucionit rezultonin të infektuar me HIV/AIDS. Institucioni e ka cilësuar këtë informacion si të fabrikuar, me qëllim krijimin e panikut dhe dëmtimin e reputacionit të punonjësve dhe institucionit. Bashkia ka bërë thirrje për hetim penal ndaj autorëve dhe shpërndarësve të këtij lajmi, duke theksuar se përhapja e dezinformatave të tilla është vepër penale dhe do të ndjekë çdo rrugë ligjore për mbrojtjen e dinjitetit të saj. Në këtë situatë, Bashkia i ka kërkuar Policisë së Shtetit dhe Prokurorisë të ndërmarrin veprime dhe ka apeluar tek qytetarët dhe mediat që të verifikojnë informacionet para se t’i përhapin.