Departamenti i Kontrollit të Brendshëm pranë Ministrisë së Punëve të Brendshme ka ngritur kallëzim penal ndaj 27 personave, përfshirë një punonjëse të MPB-së, për falsifikim dhe keqpërdorim në dhënien e patentë-shoferëve me kategori të paligjshme. Punonjësja dyshohet se gjatë periudhës 2020-2026 ka manipuluar në sistemin elektronik duke ndryshuar dhe krijuar kërkesa të reja për patenta me përmbajtje të pavërtetë, ndërsa disa persona të tjerë kanë vepruar si ndërmjetësues për realizimin e këtyre veprimeve. Në total, janë dhënë patenta për 21 persona që nuk plotësonin kushtet ligjore, ndërsa disa prej tyre i kanë përdorur këto dokumente edhe në procedura ndërkombëtare. Ministria ka kërkuar mbikëqyrje të jashtëzakonshme dhe masa disiplinore ndaj të punësuarës, duke pezulluar atë nga detyra deri në përfundim të hetimeve.