Një operacion ndërkombëtar i udhëhequr nga prokuroria e Salzburgut dhe SPAK në Shqipëri ka zbuluar një rrjet kriminal “Call Center-ash” në Tiranë që dyshohet se ka mashtruar qytetarët evropianë për mbi 50 milionë euro. Kriminelët përdorën teknologjinë Deepfake për të manipuluar video dhe foto, duke përfshirë imazhin e yllit të futbollit David Alaba dhe figurave të njohura si Presidenti Federal Alexander Van der Bellen dhe ish-Kancelari Karl Nehammer, për të joshur viktimat të investonin në platforma false si “Lion-Trade”. Në këto video të rreme, personazhet e famshëm dukeshin duke garantuar fitime të mëdha dhe duke bërë thirrje për investime, duke premtuar pagesa mujore deri në 250,000 euro për një investim fillestar prej vetëm 250 eurosh. Operacioni, i mbështetur nga Europol, ka çuar në arrestimin e dhjetëra personave në Shqipëri, ndërsa hetimet vazhdojnë për të zbuluar nëse ka edhe emra të tjerë të përfshirë në këtë skemë mashtrimi.