Një skemë e përvetësimit të mbi 54 mijë eurove nga shitja e hekurit të mbeturinave në “Kombinatin e Duhanit” në Prilep ka nxitur kallëzime penale ndaj tre personave dhe një kompanie. Sipas hetimeve, gjatë viteve 2021-2022, L.B., koordinator i grupit për sigurim, së bashku me drejtorin ekzekutiv K.S. dhe pronarin e një kompanie nga Konjara e Vogël, J.D., kanë fshehur mbi 185 mijë kilogramë hekur, duke mos regjistruar shitjen në llogaritë e Kombinatit. Paratë e përfituara në mënyrë të paligjshme janë transferuar në llogaritë bankare të disa personave fizikë dhe më pas janë dorëzuar në dorë të L.B., duke shkaktuar një dëm prej mbi 3.3 milionë denarësh. Policia ka ngritur akuza për përvetësim, keqpërdorim të pozitës, falsifikim dokumentesh dhe fshehje ndaj të përfshirëve, ndërsa kompania ka paguar vetëm një pjesë të vlerës së hekurit të shitur.