Policia e Shtetit ka finalizuar operacionin “Posta e Rreme 2”, duke goditur një skemë mashtrimi kibernetik që përdorte faqe false të Postës Shqiptare për të vjedhur të dhëna personale dhe bankare të qytetarëve. Në pranga ka rënë një 22-vjeçar francez, ndërsa një 53-vjeçar gjerman është shpallur në kërkim si bashkëpunëtor në këtë veprimtari kriminale. Gjatë operacionit janë sekuestruar celularë, karta SIM, karta bankare dhe dokumente të ndryshme që lidhen me skemën mashtruese. Policia apelon qytetarët të jenë të kujdesshëm, të mos klikojnë në linqe të dyshimta dhe të verifikojnë gjithmonë adresat zyrtare të institucioneve përpara se të japin të dhëna personale apo bankare.