Programi i Skriningut Neonatal në Kosovë ka testuar mbi 4,000 të porsalindur që nga fillimi i tij në tetor të vitit të kaluar, duke zbuluar tri raste pozitive me sëmundje të lindura metabolike dhe gjenetike. Nga këto, dy fëmijë janë diagnostikuar me Fibrozë Cistike dhe një me Fenilketonuri, ndërsa 16 raste të tjera janë nën mbikëqyrje për dyshime. Skriningu është një test i thjeshtë dhe i shpejtë që ndihmon në identifikimin e sëmundjeve që nuk shfaqin simptoma në ditët e para të jetës, duke mundësuar trajtim të hershëm dhe parandalim të komplikimeve serioze. Programi është zgjeruar në spitalet rajonale dhe së shpejti do të përfshijë edhe Ferizajn dhe Vushtrrin, me qëllim që çdo i porsalindur në Kosovë të ketë qasje në këtë shërbim jetik.