Një delegacion nga Prokuroria e Posaçme Kundër Korrupsionit dhe Krimit të Organizuar (SPAK) i Shqipërisë, i kryesuar nga drejtuesi Klodjan Braho, vizitoi Kosovën për një takim zyrtar me ushtruesin e detyrës së Kryeprokurorit të Shtetit të Kosovës, Agron Qalaj. Gjatë takimit u diskutua për funksionimin e sistemit prokurorial në Kosovë, sfidat e tij dhe nevojën për forcimin e sundimit të ligjit në të dyja vendet. Palët riafirmuan angazhimin për bashkëpunim më të ngushtë dhe koordinim në luftën kundër krimit, duke theksuar rëndësinë e trajtimit të çështjeve me interes të përbashkët. Në delegacionin shqiptar ishin gjithashtu ish-drejtuesi i SPAK, Altin Dumani, dhe prokurorja në EUROJUST, Fatjona Memçaj, ndërsa nga Kosova ishin të pranishëm edhe prokurorët Aleksandër Lumezi, Laura Pula dhe kryeprokurori i Prokurorisë Speciale, Blerim Isufaj.