Prokuroria e Posaçme kundër Korrupsionit dhe Krimit të Organizuar (SPAK) ka finalizuar një operacion kompleks kundër një grupi të strukturuar kriminal, të dyshuar për trafikun ndërkombëtar të kokainës dhe pastrimin e parave. Janë ekzekutuar urdhër-arreste për 10 persona, ndërsa janë vendosur sekuestro preventive mbi qindra pasuri të luajtshme dhe të paluajtshme në pronësi të të dyshuarve, përfshirë kompani dhe prona në disa qytete të Shqipërisë. Hetimet zbuluan trafikimin e të paktën 50 ton kokainë në periudhën 2019-2021, me ngarkesa të sekuestruara në vende si Belgjika, Ekuadori, Holanda dhe Kolumbia. Përveç trafikut, grupi dyshohet se ka pastruar paratë e fituara duke investuar në sektorë të ndryshëm ekonomikë në Shqipëri, duke përdorur skema komplekse për të fshehur origjinën e fondeve.