SPAK ka kërkuar dënimin me 13 vite burg për biznesmenin Rezart Taçi, i cili po gjykohet në mungesë për pastrim parash në kuadër të një grupi të strukturuar kriminal. Ai akuzohet për përfshirje në pastrimin e 18 milionë eurove të mafias italiane Coza Nostra, të cilat u transferuan nga Italia në Shqipëri përmes një skeme të ndërlikuar financiare. Hetimet zbardhin se llogaritë bankare u hapën nga shtetas italianë të lidhur me mafian, ndërsa shuma u depozitua në një llogari në Tiranë, me përfshirjen e familjarëve dhe bashkëpunëtorëve të Taçit. Prokuroria kërkon gjithashtu konfiskimin e shumës prej rreth 18 milionë eurosh, ndërsa hetimet kanë zbuluar lidhje të ngushta mes të pandehurve dhe drejtuesve të bankës, si dhe përgatitjen e kontratave për investime në sektorin e naftës.