Prokuroria e Posaçme Kundër Korrupsionit dhe Krimit të Organizuar (SPAK) ka mbyllur hetimet dhe ka dërguar në gjykatë dosjen ndaj gjashtë personave, përfshirë tre shtetas ukrainas, të akuzuar për trafikim dhe shfrytëzim personash në Vlorë. Ky grup kriminal u godit në vitin 2024, ku u zbuluan tre ambiente ku 24 të rinj ukrainas mbaheshin dhe punonin në kushte të vështira, me pasaportat e tyre të sekuestruara për të parandaluar arratisjen. Viktimat u rekrutuan në vende si Varshava dhe u detyruan të punonin në aktivitete të paligjshme, përfshirë transportin e drogës, ndërsa disa u dhunuan fizikisht për t’i kontrolluar dhe frikësuar. Hetimet u nxitën nga një sinjalizim i ambasadës ukrainase dhe dëshmitë e viktimave, të cilët treguan për përdorimin e dhunës dhe shantazhit, si dhe për testet e poligrafit që iu bënë para punësimit.