Në Dhomat e Specializuara të Kosovës në Hagë është marrë vendim për të hequr kufizimin e vizitave jo-privilegjuara për një person nga 11 që kishin ndalim për të vizituar ish-presidentin Hashim Thaçi, ndërsa për 10 të tjerët ndalimi mbetet në fuqi. Gjyqtari i vetëm në këtë çështje, Christoph Gosnell, vlerësoi se për shumicën e vizitorëve kufizimet janë të nevojshme për të mbrojtur dëshmitarët dhe integritetin e procesit gjyqësor, pasi ata dyshohet se kanë qenë të përfshirë në vizita gjatë të cilave janë shpërndarë informacione konfidenciale. Mbrojtja e Thaçit argumentoi se rreziqet për ndikim në dëshmi janë zvogëluar pasi faza e paraqitjes së provave ka përfunduar dhe se nga dhjetori 2023 nuk janë raportuar incidente gjatë vizitave. Procesi gjyqësor ndaj Thaçit dhe bashkëakuzuarve vazhdon, me afate të caktuara për dorëzimin e mocioneve dhe dëshmive, ndërsa aktakuza përfshin akuza për pengim të drejtësisë dhe shkelje të fshehtësisë së procedurës.