Duke filluar nga 1 maji 2026, Spitali i Përgjithshëm në Pejë do të zbatojë për herë të parë sistemin e triazhimit në repartin e Emergjencës, duke trajtuar vetëm rastet që kërkojnë ndërhyrje të menjëhershme dhe që rrezikojnë jetën. Kjo do të thotë se pacientët me dhimbje të forta në gjoks, vështirësi në frymëmarrje, humbje të vetëdijes, gjakderdhje të mëdha apo trauma serioze do të kenë përparësi në trajtim. Rastet jo emergjente do të duhet të drejtohen tek kujdesi parësor ose ambulancat specialistike, ndërsa hyrja në Emergjencë do të jetë e kufizuar vetëm për pacientët me një përcjellës në raste të domosdoshme. Ky organizim synon të përshpejtojë trajtimin e rasteve urgjente dhe të sigurojë një shërbim më efikas dhe të sigurt për të gjithë pacientët.