Ekipi i Televizionit Dukagjini, përbërë nga gazetarja Blerta Zuka dhe kameramani Enkelej Shaljani, u pengua dhe sulmua fizikisht sot në Gjilan gjatë realizimit të një kronike për punimet në sheshin e qytetit. Sulmi u krye nga një punonjës i kompanisë që po kryen punimet, duke ndaluar kështu punën profesionale të ekipit dhe cenuar lirinë e medias. Televizioni Dukagjini dënon fuqishëm këtë veprim dhe kërkon nga organet kompetente ndërhyrje të menjëhershme dhe përgjegjësi ligjore për sulmuesin. Asociacioni i Gazetarëve të Kosovës mbështet këtë qëndrim, duke bërë thirrje për masa nga organet e sigurisë dhe distancim nga Komuna e Gjilanit, në mënyrë që gazetarët të mund të kryejnë lirshëm detyrën e tyre në interes të publikut.