Gjykata Supreme e Kosovës ka aprovuar ankesat e mbrojtësve dhe ka anuluar vendimin e Gjykatës së Apelit për caktimin e paraburgimit prej 30 ditësh ndaj tre të dyshuarve, Edmir Ahmagjokaj, Aurel Kaziu dhe Ardit Laska, në rastin e shpëlarjes së rreth 1 milion eurove të sekuestruara në pikën kufitare në Merdarë më 24 shkurt 2026. Gjykata Themelore në Prishtinë më parë kishte refuzuar kërkesën e Prokurorisë për paraburgim, por Apeli e kishte ndryshuar këtë vendim, duke caktuar masën e paraburgimit, vendim ky që u kundërshtua nga mbrojtësit e të pandehurve. Supremja vlerësoi se vendimi i Apelit përmbante shkelje esenciale të dispozitave të procedurës penale, pasi nuk kishte arsyetuar në mënyrë të mjaftueshme ekzistimin e “dyshimit të bazuar” dhe nuk kishte lidhur qartë provat me veprimet e të dyshuarve. Rasti është kthyer në rivendosje në Gjykatën e Apelit, e cila është e detyruar të japë arsyetime më të detajuara lidhur me dyshimin e bazuar, duke respektuar praktikën e Gjykatës Evropiane për të Drejtat e Njeriut.