Gjykata Supreme e Kosovës ka reaguar ndaj pretendimeve të Odës së Avokatëve për vonesa në shqyrtimin e ankesave lidhur me vendimet për paraburgim. Sipas Supremes, pas verifikimeve të kryera, pretendimet për vonesa sistematike janë të pavërteta dhe çështjet trajtohen me urgjencë dhe prioritet brenda afateve ligjore dhe standardeve ndërkombëtare. Gjykata fton Odën e Avokatëve që nëse ka raste konkrete me vonesa të pretenduara, t’i adresojë ato tek kryetari i Gjykatës për shqyrtim të mëtejshëm. Supremja thekson përkushtimin e saj për respektimin e të drejtave themelore dhe bashkëpunimin me aktorët e sistemit të drejtësisë për garantimin e sundimit të ligjit.