Gjykata Supreme e Kosovës ka shfuqizuar paragraf 2 të nenit 61 të Statutit të Odës së Avokatëve të Kosovës (OAK), i cili parashihte humbjen automatike të së drejtës për ushtrimin e avokatisë në rast të mospagesës së obligimeve financiare brenda afatit të caktuar nga Oda. Ky vendim erdhi pas padisë së Nasuf Hasanit, i cili kundërshtoi këtë dispozitë si të paligjshme dhe në kundërshtim me Ligjin për Avokatinë. Gjykata theksoi se Statuti i OAK-së kishte krijuar një standard më të ashpër se ligji, duke i dhënë Odës kompetencë për të vendosur afate më të shkurtra, gjë që cenonte parimin e hierarkisë së akteve juridike dhe sigurinë juridike. Në aktgjykim u sqarua se kontrolli gjyqësor mbi aktet nënligjore nuk cenon pavarësinë funksionale të OAK-së, por garanton funksionimin e saj brenda kornizës ligjore.