Në Qendrën Korrektuese të Dubravës ka nisur procesi i krasitjes së mollëve në plantacionin prej 2.5 hektarësh, ku të burgosurit punojnë nën mbikëqyrjen e stafit përgjegjës. Ky aktivitet ka për qëllim mirëmbajtjen e plantacionit dhe aftësimin e të burgosurve në sektorin e bujqësisë, duke u dhënë atyre mundësi për fitimin e përvojave praktike profesionale gjatë qëndrimit në qendër. Iniciativa është pjesë e përpjekjeve për rehabilitimin dhe risocializimin e të burgosurve, duke i mundësuar atyre të fitojnë aftësi të reja që mund t’i shfrytëzojnë pas përfundimit të dënimit. Angazhimi në punë praktike bujqësore synon të ndihmojë në përgatitjen e të burgosurve për një rikthim më të suksesshëm në shoqëri.