Në Qendrën Korrektuese për të Mitur në Lipjan vazhdon projekti i kultivimit të perimeve në serra, ku të miturit përfshihen në aktivitete rehabilituese dhe profesionale. Në serrat e kësaj qendre janë mbjellë kultura të ndryshme bujqësore si domate, speca dhe tranguj, të cilat përdoren jo vetëm për nevojat e brendshme të Qendrës, por edhe nga institucionet e tjera të Shërbimit Korrektues të Kosovës. Kjo iniciativë ndihmon në uljen e kostove operative dhe rrit vetëqëndrueshmërinë e sistemit korrektues, duke ofruar një mundësi të rëndësishme për edukimin dhe përfshirjen praktike të të miturve. Projekti tregon një qasje të re dhe pozitive në trajtimin dhe rehabilitimin e të rinjve brenda institucioneve korrektuese.