Gjykata Themelore në Prishtinë ka shpallur të pafajshëm katër persona të akuzuar për keqpërdorim të pozitës zyrtare në rastin e një kontrate të KEK-ut për riparimin e punëtorisë elektro-makinerike me garderobë. Prokuroria pretendonte se operatori ekonomik “Ar-Tech” kishte përfituar padrejtësisht, pasi disa punime nuk ishin kryer, duke shkaktuar dëm financiar prej mbi 7,000 eurosh. Të akuzuarit, përfshirë udhëheqësin e servisit dhe anëtarët e komisionit të pranimit teknik, kishin mohuar fajësinë gjatë gjithë procesit. Pas shqyrtimit të provave, gjykata ka vendosur lirimin e tyre, duke i shpallur të pafajshëm nga të gjitha akuzat.