Mbrëmjen e 23 gushtit, rreth orës 22:30, në fshatin Begracë të Kaçanikut u raportuan të shtëna me armë zjarri gjatë një ahengu familjar. Policia në bashkëpunim me Njësinë e Reagimit të Shpejtë nga Ferizaj ndërmori veprime të shpejta, duke identifikuar dhe ndaluar dy persona të dyshuar, J.S. dhe B.Z., të cilët u intervistuan në stacionin policor. Gjatë kontrollit u sekuestruan dy pistoleta, 65 fishekë dhe 15 gëzhoja, ndërsa rasti u iniciua për veprat penale të mbajtjes së paautorizuar të armëve dhe përdorimit të armës apo mjetit të rrezikshëm. Me vendim të prokurorit, të dy të dyshuarit janë ndaluar për 48 orë, ndërsa hetimet vazhdojnë për zbardhjen e plotë të ngjarjes.