Sot rreth 23 mijë nxënës në Kosovë po i nënshtrohen Testit të Arritshmërisë, por vetëm pak minuta pas nisjes së tij, pyetjet dhe përgjigjet e sakta kanë filluar të shpërndahen në mënyrë intensive në rrjetet sociale, veçanërisht në platformën Viber. Nxënësit kanë krijuar grupe dhe “chat room” të veçanta për të qarkulluar materialet e testit në mënyrë të organizuar, duke e bërë shpërndarjen shumë të shpejtë dhe masive. Kjo nuk është hera e parë që ndodh, pasi edhe në provimet e mëparshme, përfshirë Provimin Shtetëror të Maturës, pyetjet janë fotografuar dhe shpërndarë në rrjetet sociale pavarësisht sanksioneve të paralajmëruara. Ndërkohë, prindërit kanë kërkuar largimin e këtij testi për shkak të ngarkesës që i shkakton nxënësve, por Ministria e Arsimit ende nuk ka marrë ndonjë vendim për këtë çështje.