Tetë persona janë përballur në Gjykatën Themelore në Prishtinë për një seri grabitjesh të armatosura në banka, pompa derivatesh dhe markete, por asnjëri prej tyre nuk ka pranuar fajësinë. Sipas aktakuzës, këta të pandehur dyshohen se gjatë vitit 2017 kanë kryer grabitje me armë, duke përfshirë përdorimin e armëve AK-47 dhe armëve të shkurtra, në filialet e NLB Bankës, ProCredit Bankës, TEB Bankës, si dhe në disa pompa dhe markete në Prishtinë, Fushë Kosovë dhe Drenas. Në disa raste janë marrë shuma të konsiderueshme parash, ndërsa gjatë një tentative grabitjeje është plagosur një punëtor. Përveç tetë të akuzuarve që janë para gjykatës, hetimet për dy persona të tjerë janë pezulluar pasi ata ndodhen në arrati, ndërsa të pandehurit mbeten të pafajshëm derisa të vërtetohet ndryshe me vendim të formës së prerë.