Mijëra pushues dhe turistë janë bllokuar prej orësh në zonën e Ranës së Hedhun, në aksin Lezhë–Milot, për shkak të një fluksi të madh automjetesh gjatë fundjavës. Kolonat e trafikut shtrihen për kilometra të tëra, duke krijuar vështirësi të mëdha në qarkullim dhe duke ndikuar veçanërisht në familjet me fëmijë të vegjël që ndodhen në automjetet e bllokuara. Qytetarët raportojnë se kanë qëndruar të bllokuar për rreth dy orë, pa mundur të lëvizin normalisht. Situata e rënduar në këtë aks rrugor ka shkaktuar shqetësim dhe ka vënë në vështirësi lëvizjen e pushuesve drejt destinacionit të tyre.